ފުވައްމުލައް ސިޓީގެ ރައްޔިތުންގެ ހިތްތަކުގައި ދީނަށް ލޯބި ޖެއްސުމާއި، ދީނީ ކަންކަމަށް އަހުލުވެރިކުރުވުމުގެ މަގްސަދުގައި ކުރިޔަށްގެންދާ "އިސްލާމް ދީނާއި ސައިންސް ފޯރަމް 1447"ސިލްސިލާ ޕްރޮގްރާމް ރޭ ރަސްމީކޮށް ފަށައިފިއެވެ. .

މި މަހުގެ ހަ ވަނަ ދުވަހުގެ ނިޔަލަށް ފުވައްމުލައް ސްކޫލް، އަބްދުލްހަމީދު މާލަމުގައި ކުރިއަށްދާ މި ފޯރަމްގައި މިފަހަރު ބައިވެރިވަނީ އަމިއްލަ ސްކޫލްތަކާއި އަމިއްލަ އެކި ފަރާތްތަކުންނެވެ. ފޯރަމް ފެށުމުގެ ގޮތުން ރޭ ބޭއްވި ރަސްމިއްޔާތު ޝަރަފްވެރިކޮށްދެއްވީ އައްޝައިހް މުޙައްމަދު އަނީލް އެވެ.

މި ފޯރަމް ފައްޓަވައިދެއްވަމުން ޝައިހް އަނީލް ވިދާޅުވީ، ފުވައްމުލައް ކައުންސިލުން އިސްނަގައިގެން ބާއްވާ މި ފޯރަމްގެ ސަބަބުން، ރާއްޖޭގެ އެކި ހިސާބުތަކުގައި މިފަދަ އިތުރު ފޯރަމްތައް ބޭއްވުމަށް ބާރަކަށް ވެފައިވާ ކަމަށެވެ. އަދި މިފަދަ ޕްރޮގްރާމްތައް މާލޭގައިވެސް ކުރިއަށް ގެންގޮސްފައިވާކަން އޭނާ ފާހަގަކުރެއްވިއެވެ. ފޯރަމްގައި ވާހަކަ ދައްކަވަމުން އަނިލް ވިދާޅުވީ:

"އަޅުގަނޑު އައްޑޫ ހައިސްކޫލްގެ ޕްރިންސިޕަލަށް ދެންނެވިން މި ޕްރޮގްރާމް ވަރަށް ސަޅިއޭ، މި ފަދަ ޕްރޮގްރާމެއް ކުރިޔަށް ގެންދެވިދާނެއޭ، އެ ކުދިން (ދަރިވަރުންނަށް) ޚިޔާލެއް ދިނީ، އެކުދިން އަމިއްލަ އަށް ހުރިހާ ކަމެއް ތައްޔާރުކުރީ، އެކުދިން މާ ފުރިހަމަކޮށް އެކަން ކުރި، އަނެއްކާ މިހާރު އެކުދިން އެބަދޭ މިފަދަ ފޯރަމަކަށް ތައްޔާރުވަމުން، މިކަމުގެ ކުރެޑިޓް އަޅުގަނޑު ދޭނީ ފުވައްމުލައް ސިޓީ ކައުންސިލަށް މިފަދަ ކަމެއް ފެއްޓެވީމަ" އަނިލް ވިދާޅުވިއެވެ.

ރޭ ބޭއްވި ފުރަތަމަ ފޯރަމްގައި ދަރިވަރުން ވަނީ އިސްލާމް ދީނާއި ސައިކޮލޮޖީއާ ގުޅޭގޮތުން ހުށަހެޅުންތަކެއް ހުށަހަޅާފައެވެ. ކުރިއަށް އޮތް ދުވަސްތަކުގައި އިސްލާމް ދީނާއި އިލްމު، އިސްލާމް ދީނާއި އިގްތިސާދު، އިސްލާމް ދީނާއި ފަންނުވެރިކަން، އިސްލާމް ދީނާއި ކެއިންބުއިން، އަދި އިސްލާމް ދީނާއި ތިމާވެށި ފަދަ މުހިންމު މައުޟޫއުތަކަށް ހުށަހެޅުންތައް ފެނިގެންދާނެއެވެ.