ފުވައްމުލައް ސިޓީގެ ތަރައްގީގެ ގިނަ މަސައްކަތްތައް ހަލުވިކަމާއިއެކު މިކައުންސިލުން އެކި ފަރާތްތަކާއި ގުޅިގެން ކުރަމުންދާއިރު ތަރައްގީގެ މަސައްކަތްތަކަކީ ރޭވުންތެރިކަމާއިއެކު ކުރެވޭ މަސައްކަތްތަކެއްކަން ކަށަވަރު ކުރުމަކީ މުހިންމުކަމެކެވެ. އަދި މިސިޓީގެ ތަރައްގީ ޕްލޭންގެ މައިގަނޑު ފަސް އަމާޒުގެ ތެރެއިން އެއް އަމާޒަކީ "ޕްލޭންކުރެވިފައިވާ ދިރިއުޅެން ފަހި ސިޓީ" އަކަށް ފުވައްމުލައް ހެދުންކަމަށް ވާއިރު، އެ އަމާޒަށް ވާސިލްވުމަށް ކުރެވޭ މަސައްކަތުގެ ތެރެއިންް މިހަފްތާގެ އާދީއްތަ ދުވަހު މިކައުންސިލުން ވަނީ އުމްރާނީ ތަރައްގީއާއި ގުޅުންހުރި އެކި މަސައްކަތްތައް ފަރުމާކޮށް އެއާއި ގުޅުންހުރި ކަންކަމުގައި ލަފާދިނުމުގެ އެއްބަސްވުމެއްގައި ޝެރެޓް ސްޓޫޑިއޯ އެކު ސޮއިކޮށްފައެވެ.

މިއެއްބަސްވުމުގެ ދަށުން އަންނަނިވި ކަންތައް ކުރެވޭނެއެވެ.

ބިނާވެށިޕްލޭން އެކުލަވާލުން

ސިޓީ ސެންޓަރުގެ މާސްޓަރ ޕްލޭން ފަރުމާކުރުން

ކިޅި ސަރަހައްދުގެ މާސްޓަރ ޕްލޭން ފަރުމާކުރުން

ތޫނޑު ސަރަހައްދުގެ މާސްޓަރ ޕްލޭން ފަރުމާކުރުން

ޕްލޭންކުރުމާއި ތަރައްގީ ކުރުމުގައި އަމަލުކުރަންޖެހޭ އުސޫލުތައް ފަރުމާކުރުން

ޖިއޮގްރަފިކް އިންފޮމޭޝަން ސިސްޓަމް ޤާއިމުކުރުން

ސޮއިކުރެވުނު މިއެއްބަސްވުމުގެ ދަށުން މިސިޓީގެ ބިންތައް އެންމެ އެކަށީގެންވާ ގޮތުގައި ބޭނުންކުރުމަށް މަގުފަހިވެގެންދާނެއެވެ. އަދި މިސިޓީއަށް ލިބިފައިވާ ގުދުރަތީ ވަސީލަތްތައް އެންމެ ފައިދާހުރި ގޮތުގައި ބޭނުންކުރުމަށާއި، ތިމާވެށި ރައްކާތެރިކުރުމަށް ހާއްސަ ފިޔަވަޅުތަކެއް އެޅިގެންދާނެއެވެ. މީގެ އިތުރުން ތަރައްގީގެ މަޝްރޫއުތައް ހިންގުމުގައި ހަރުދަނާ އުސޫލުތައް ގެންގުޅެވި، މަޝްރޫއުތައް ހަލުވިކަމާއިއެކު ކުރިއަށް ގެންދެވުމަށް މަގުފަހިވެގެންދާނެއެވެ.

މިއެއްބަސްވުމުގެ މުއްދަތަކީ މަސައްކަތުގެ އެއްބަސްވުމުގައި ސޮއިކުރާ ތާރީޚުން ފެށިގެން 12 މަސްދުވަހުގެ މުއްދަތެކެވެ.