އޭޝިއާގެ އެންމެ ބޮޑު އަދި އެންމެ ފަޚުރުވެރި ޑައިވިންގ އެކްސްޕޯ ކަމުގައިވާ 'ޑައިވިންގ ރިސޯޓް އެންޑް ޓްރެވަލް ޝޯ' ޑީއާރްޓީގައި ދޭ 'ބެސްޓް ޝާކް ޑައިވިންގ ޑެސްޓިނޭޝަން' އެވޯޑު ފުވައްމުލައް ސިޓީއަށް ލިބިއްޖެއެވެ. މިއެވޯޑަކީ މިޔަރުތަކާއި އެކު ފީނުމުގައި އެންމެ މޮޅު ތަޖުރިބާ ފޯރުކޮށްދޭ ތަނަކަށް އެތަނެއްގެ ދިރޭތަކެތީގެ ނަސްލުތަކުގެ ގިނަކަމާއި، ފީނާ ފަތުރުވެރިންނަށް އޮންނަ ރައްކާތެރިކަމާއި އަމަލުކުރަމުންދާ ދެމެހެއްޓެނިވި ގޮތްތައް އެކްސްޕޯ ބާއްވާ ފަރާތުން ކަނޑައަޅައި ޓީމަކުން ވަޒަންކުރުމަށްފަހު ދެވޭ އެވޯޑެކެވެ. މީގެއިތުރުން، މި އެވޯޑު ދިނުމުގައި ފަތުރުވެރިންގެ ފަރާތުން ލިބިފައިވާ ޚިޔާލުތަކާއި ފާޑުކިޔުންތަކަށްވެސް ރިޢާޔަތްކުރެވެއެވެ. މިއެވޯޑު ފުވައްމުލައް ސިޓީއަށްދީފައިވަނީ މިހާރު ޗައިނާގެ ހޮންގކޮންގގައި ކުރިއަށްދާ ޑީއާރްޓީ އެކްސްޕޯ 2024 ގައެވެ.

މި ޝަރަފުވެރި ކާމިޔާބީއަކީ ފުވައްމުލައް ސިޓީގެ ކަނޑުއަޑީގެ މުއްސަނދިކަމާއި، މި ސިޓީ ރަށު ފަތުރުވެރިކަމުގެ މަންޒިލެއްގެ ގޮތުގައި ބައިނަލްއަޤްވާމީ ފެންވަރުގައި އިތުރަށް މަޝްހޫރުވެގެންދާނެ ކަމެކެވެ. އަދި މުސްތަޤުބަލުގައި ރަށު ފަތުރުވެރިކަން އިތުރަށް ކުރިއަރައި، މިޔަރުތަކާއެކު ފީނުމަށް އެންމެ އެކަށޭނަ މަންޒިލްކަން ދުނިޔެއަށް އިތުރަށް ހާމަކޮށްދޭނެ ހެއްކެކެވެ.

ރާއްޖޭގެ އެހެން ރަށްތަކާ ތަފާތު، ވަކި ޚާއްޞަ ޤުދުރަތީ ސިފަތަކެއް ލިބިގެންވާ ފުވައްމުލަކަށް ފަތުރުވެރިންގެ އެންމެ ބޮޑު ސަމާލުކަމެއް ލިބޭ އެއް ކަމަކީ، މިރަށުގެ ވަށައިގެންވާ ކަނޑުގައި އުޅޭ ފެމުނު މިޔަރުތަކެވެ. މީގެ އިތުރުން، ރާއްޖެއިން މިހާރު މަދުން ފެންނަ ބާވަތްތަކުގެ މިޔަރާއި މަޑީގެ ބާވަތްތައް ފުވައްމުލަކުގެ ކަނޑުން ފެންނާތީ، މިޔަރުތައް ކައިރިން ބަލައި، އެ ސަރަޙައްދުގައި ފީނުމަށް ކޮންމެ މަހަކުވެސް ގިނަ އަދަދެއްގެ ފަތުރުވެރިން ފުވައްމުލަކަށް ޒިޔާރަތްކުރެއެވެ.

މި ފަޚުރުވެރި މުނާސަބަތުގައި، ފުވައްމުލައް ސިޓީ ކައުންސިލުން، މި ސިޓީގެ ރަށު ފަތުރުވެރިކަމުގެ ސިނާޢަތުގައި ހަރަކާތްތެރިވާ ޑައިވް ސެންޓަރުތަކަށާއި، ގެސްޓްހައުސްތަކަށާއި، އަދި ފަތުރުވެރިކަމުގެ ދާއިރާގައި މަސައްކަތްކުރާ އެންމެހައި ފަރާތްތަކަށް އިޚްލާޞްތެރި ޝުކުރެއް ދަންނަވަމެވެ. މި ފަރާތްތަކުގެ ހިތްވަރުގަދަ މަސައްކަތާއި ފުންނާބު އުސް ޝައުޤުވެރިކަމުގެ ސަބަބުން، ފުވައްމުލަކުގެ ކަނޑުގެ ދިރުމުގެ އަޖައިބުތައް ދުނިޔެއަށް ހާމަކޮށްދިނުމުގައި ދެއްކެވި ޢަޒުމަކީ، މި ސިޓީ ދުނިޔޭގެ ޗާޓުގައި ފާހަގަކުރެވުމުގައި އެންމެ އިސް ދައުރެއް އަދާކުރި އެއް ކަމެވެ.

މި ޝަރަފުވެރި އެވޯޑަކީ ފުވައްމުލަކުގެ ފަތުރުވެރިކަން އިތުރަށް ކުރިއެރުވުމަށް ލިބުނު އަގުހުރި ހިތްވަރެއްގެ ގޮތުގައި ދެކެމެވެ. މި ފުރުޞަތުގައި، ކުރިއަށް އޮތް ތަނުގައިވެސް ފުވައްމުލަކުން ލިބެންހުރި ތަފާތު އަދި ޚާއްޞަ ތަޖުރިބާތައް ދުނިޔެއަށް ފޯރުކޮށްދީ މި މަސައްކަތުގައި ރަށުގެ އެންމެހާ ރައްޔިތުންނާއި، ފަތުރުވެރިކަމުގެ ދާއިރާގައި ހަރަކާތްތެރިވާ ހުނަރުވެރި ފަންނުވެރިންނާ ގުޅިގެން، ފުވައްމުލަކުގެ ފަތުރުވެރިކަން ދެމެހެއްޓެނިވި ގޮތެއްގައި ތަރައްޤީކުރުމަށްޓަކައި މަސައްކަތްކުރާނެކަމުގެ ފުރިހަމަ ޔަޤީންކަން އަރުވަމެވެ.